شباك الهوى

بعد دا كله كمان بتشتكي؟!

محمد عبد الماجد

في ظل التصاعد الذي يعيشه المريخ في (التشاكي) المستمر الذي يجعله بعد كل مباراة يقدم شكوى، أتوقع أن يصل المريخ في يوم من الأيام لتقديم شكوى للاتحاد العام لأنه لم يجد شكوى يقدمها في المباراة!؟

وهذا في حد ذاته عند المريخاب شكوى.. وبيني وبينكم محمد حلفا دا لو المريخ قدم ليه برقية تعزية ح يعتبرها شكوى ويمنحهم ثلاث نقاط، حالة المريخ دي زي حالة واحد مشى يخطب، قعد مع أبو البنت وما لقى ليه مناسبة في الكلام عشان يطلب يد البنت، والد البنت مسكهُ ليك قصص وحكاوى من تاريخ المهدية إلى حكومة كامل إدريس، الولد ساعة ونص ما لقى ليه مدخل أو مناسبة عشان يستغلها ويطلب يد البنت من أبوها، وقت الولد زهج شديد وطوّل في القعدة، أبو البنت تحدث عن حرب روسيا مع أوكرانيا، الولد قال ليه بمناسبة هذه الحرب أنا طالب يد بنتك!!!

وناس المريخ ممكن يقدموا شكوى لنفس السبب وممكن يصلوا الأمم المتحدة كمان!!!

روسيا حربها على أوكرانيا غير قانونية، دي ثلاث نقاط جاهزة بالنسبة للمريخ في وجود محمد حلفا رئيساً للجنة المسابقات.

الكورة في العالم كله نصر أو هزيمة، إلا في المريخ نصر أو شكوى..!!!

نقلا عن آكشن سبورت